适口而止、适可而止——上海人的饮食生活（中）
往期回顾：改革开放以后，从全国范围来讲，上海个点心仍旧坚持小一号个精品化路线。城隍庙湖心亭茶楼有小点心搭配个茶点，就怕侬一吃就饱，做得特别个精巧，豆腐干比张邮票还要小，茶叶蛋用鹌鹑蛋做，火腿粽子只有大节头介大，十三道红丝线一道也勿会少，亦小亦美嘛。1984年，英国女皇伊丽莎白二世访问上海，勒市长陪同下品香茗，吃船点，听江南丝竹。绿波廊里卖得老好个“元首夫人套点”也是邪气袖珍个，搿勿是中国茶文化搭上海人生活质量个体现嘛？
老底子因为穷，大多数上海人进面馆，只好吃碗光面充饥，不过老板、伙计是一视同仁，热情接待个，拿光面叫做阳春面。还要问吃客：要硬点还是烂点？重香头还是免香头？宽汤还是紧汤？一碗阳春面也让侬有介许多个选择，真是让人如坐春风呀。
改革开放之后，条件好了，上海人可以吃吃浇头面了，浇头烧得好吃，就成为了特色。老上海吃浇头面，兴致来了就点双浇，一荤一素，也有点两只荤个，比方，熏鱼搭红烧羊肉，也称“红两鲜”。老吃客也有讲究，点碗浇头面，过桥，就是拿浇头搭面分开来摆，再叫杯黄酒，浇头过过老酒，酒吃光之后，拿浇头剩下来个汁水倒到面碗里，面也就更加有滋味，一碗面吃光，酒足饭饱，勿失体面。
上海人欢喜吃汤团，特别是王家沙个鲜肉汤团，有眼会得算计个老人只吃软糯适口个汤团皮，拿里向个肉个芯子带转去，加两棵菜心烧碗肉圆菜心汤，一顿简单个中饭就对付过去了。
以前，有眼点心店还有道点心，叫做馄饨面。搿是种邪气经济个吃法，二两阳春面，加一两馄饨，勿是浇头、胜似浇头。以前，上海有交关体贴人、照顾人个小吃品种，搿是中老年人特别怀念个地方。
再譬如，勒饭店吃饭，走油蹄髈、酱爆猪肝、八宝辣酱、红烧头尾搿类浓油赤酱个菜，吃到最后盆底还剩眼菜脚搭汤水，服务员就凑上来问：加半块豆腐或者菜心再回烧哪能？早几年行吃象鼻蚌搭龙虾，一道海鲜钞票勿少，但上海人还是讲究实惠，吃剩来个龙虾头尾或者象鼻蚌个内脏，就请厨师烧一道泡饭，可以抵一道点心，一眼也勿坍台个。
上海人招待人客，合乎礼仪是邪气重要个，但也讲究适可而止，铺张浪费邪气少个。排场忒大，搿叫死要面子，人客也受勿了，假使鱼翅、鲍鱼、燕窝、大闸蟹一道上来，伊拉会得觉着主人是有意摆阔，心里也会勿适意个。因此，干鲍、海参、鱼翅之类个硬菜，勒上个饭店里销路勿算好个。
吃剩有余，照例打包，据说是勒上海最先实行个。点菜辰光，勒亲民个饭店里，服务小姐就会提醒食客勿要点得忒多。伊会当参谋，荤素搭配，有干有湿，让人觉着人情味道蛮浓，因此就会得更加信任搿爿店，成为回头客。但即使是搿能，哪怕还有眼盆底，服务员也会得鼓励侬打包。交关饭店备有打包个袋袋或者盒头，汤菜勿会得洒出来个。有眼还做得蛮精致，店名搭订座电话也勒上头。
也有眼上海人特别要面子，请客之后打包，讲是拨小狗吃个，其实呢，是伊个下一顿。大家侪照顾伊个面子，心照不宣个。
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问。